Salamin

Share
  • 1
  •  
  •  
  •  
  •  
  •  
  •  
  •  
  •  
  •  
  •  
  •  
    1
    Share

Maraming istorya ang hinabi ng matatanda. Isa na dito ang pagtingin sa salamin hawak ang isang kandila sa hating-gabi ng kabilugan ng buwan. Ayon sa kwento, ang isang pangitain ay maaaring maaninag sa salamin na magpapakita ng iyong kapalaran. Maaaring isang tao na magiging bahagi ng iyong bukas.

Ngunit sa kabila nito ay may naka ambang panganib ang pagsasagawa ng ganitong bagay at maaring maging daan upang mabuksan ang isang lagusan kung saan ang mga kaluluwa ng nakaraan ay sumabay sa paglabas sa salamin. Dala nito ang matinding pagdating ng di inaasahang mga pangyayari. Maari din namang magduktong ang nakaraan sa hinaharap at magdala ng alaala na pilit na humahanap ng puwang sa kasalukuyan.

Isang kwento na kung iisipin ay di na maaaring mangyari sa panahon ngayon, kung kailan ang tao ay alipin na ng mga kaalamang nagdala na sa kanya sa kalawakan at sa ibang planeta, at ang pagsulpot mga samut-saring gamit na ngayon ay halos nagduduktong ng mga taong nasa malayong lugar, sa isang kisapmata.

Kahapon lamang ay nanood ako ng isang pelikula na nakakatakot. Halos maubos na nga ang boses ko sa pagsigaw habang tinataga ng isang halimaw na tao ang kanyang mga biktima. At maaring dahil dito ay sobrang himbing ang aking pagtulog ng gabing iyon, dala ang takot at di mawaring pagkagulat. Sabi nila, ang panaginip daw ay may dalang mensahe. Ikatlong araw nang paulit ulit ang aking panaginip. Ganoon pa din. Isang bahay na maraming kwarto. Nanduon ang aking pamilya, at nakatira kami sa isang “apartment” na may magkakatabing kwarto. Nakita ko ang may-ari ng bahay, nasa kabilang kwarto katabi ng aming tinutulugan. Kilala ko ang taong ito. Ngunit kahit nakikita nya ako at nakikita ko din sya ay parang magkaibang panahon kami dahil hindi kami nag uusap. Ni hindi nya ako tinitignan ngunit nakikita ko naman sya at kausap nya ang ibang tao sa aking panaginip.  Kagabi lamang ay ganoon na naman. Isang bahay lang nangyayari ang eksena. Nasa kwarto ako, lumabas ako sa salas at natanaw ko ang isang kwarto na nasa tabi ng aking tinutulugan. andun ulit sya, ngunit di ko sya kinakausap. Basta andun lang sya at parang may sariling mundo na hindi apektado kung ano ang aming ginagawa.  Ngunit sya ang may-ari ng bahay, at kami ay nakatira lamang.

Nagresearch ako sa ibig sabihin ng aking panaginip. Ang bahay ay simbolo ng iyong isip at kamalayan at ang kabuuan ng iyong pagkatao. Kung ano ang estado ng bahay ay estado ng iyong kalusugan (ng isip at katawan/kaluluwa). Ang bahay sa aking panaginip ay isang malinis na bahay, parang panahon ng Kastila. Ang mga sahig ay malinis at makintab, ang mga kwarto ay malaki at mayroong isang malaking komedor kung saan makikita mo ang lahat ng kwarto sa paligid. Doon sa isang sulok ay anduon ang taong pangatlong gabi ko nang nakikita. Sya ang nagmamay-ari ng bahay. Ngunit kung ang bahay ay simbulo ng sarili, maari bang ang taong ito ay naninirahan sa aking isip? Hindi naman ako nakakaramdam ng galit ngunit ako ay nagtataka kung bakit sya ang nagmamay-ari ng bahay na aking ginagalawan? Ha. masyado lang akong nanonood ng mga bagay na nakakatakot kaya siguro. Kailangan ko bang kaibiganin si Sigmund at si Carl, upang maintindihan ang naglalaro sa aking isip?

Hindi pa naman ako masyadong tumatawid sa katinuan ng isip kaya’t hindi ko na siguro tatawagin ang taong ito sa salamin. Bukas ay kabilugan ng buwan. Susubukan ko munang matulog ulit at baka sakaling mawala din ang paulit-ulit na panaginip ko. Hindi na din ako manonood ng mga nakakatakot sa gabi. Masyadong malikot ang aking imahinasyon. At lalong hindi ko na din gustong makakita ulit ng mga pangitain, sa panahon na ang tao ay alipin na ng teknolohiya.

-kathang isip, ng makatang isip.

Cricket

Leave a Reply

Your email address will not be published. Required fields are marked *