Gabay

Share
  • 1
  •  
  •  
  •  
  •  
  •  
  •  
  •  
  •  
  •  
  •  
  •  
    1
    Share

Maliit pa lang ako ay lagi na akong binabantayan ng aking mga magulang dahil madali akong madapa. Sabi nila ay “flat footed” ako. Sa totoo lang, ako ay “clumsy” at “awkward” dahil minsan, masyadong  mabilis ang takbo ng aking isip kaysa sa aking katawan. Maliit pa lamang ako ay ako ang  paboritong laruan ng aking mga Tito at Tita. Kasi ay mabilis ko daw makabisado ang lahat ng bagay na itinuturo nila sa akin. Kabisado ko pa ang Tagalog na “tongue twister” na naituro sa akin nuong “three years old”  ako. “Isang dalawang tikling, malapat sapat tingga, bibit, kalabit, punyal, puslit” ito ang tinuro ng aking Tita Lolet na mahal na mahal ko maliban sa aking ina at kay Mama Jo, na nagpaaral sa akin nung college.

Lagi akong nag uuwi ng medalya kaya si Mama ay napagod na sa pagpanik sa stage. Minsan, sina Tito Jess na ang nagsasabit ng medalya ko kasi wala na akong tatay.  Lalo na pag hinhakot ko ang ibang “awards” sa pagsulat at ibang activities sa school (maski sa arts at sa giftwrapping.)

Hindi ko alam kung bakit sa aking sarili ay gusto kong laging manalo at makapag-uwi ng kasiyahan sa aking magulang. Minsan ay sadyang mahilig lang talaga ako magbasa at mag-aral kaya sabi nila ay “expected” na nilang “running for honors” ako. Hindi naman ako perpekto. Nagkakamali din ako. Tulad nga ng sinabi ko ay hindi ako kasing tibay ng ibang bata sa takbuhan at sa paglalaro. madaming peklat ang naging mistulang alaala ng mga oras na ako ay bumabagsak sa lupa.

Masakit ang bawat pagbagbagsak. Ngunit pilit pa din akong bumabangon. Madalas din akong ma-bully ng mga tao kasi hindi ako mahilig gumanti or lumaban sa mga bata (at sa mga taong nakakasalamuha ko nung matanda na ako). Ngunit minsan sa buhay ng isang tahimik at mapag-isip na batang katulad ko ay may mga halimaw na pilit akong hinahamon at ang munting boses na nagpupumiglas upang ako ay lumaban ay unti unting lumalakas.

Nang ako ay mag-asawa, naranasan ko ding mabuhay na nakikisama sa ibang tao. Dito ko natikman ang lahat ng hirap at pagsakit ng damdamin dahil ako ay sadya ngang tahimik at di lumalaban. Pero dahil mahilig ako makipagpaligsahan sa ibang tao at aking sarili, ay nilabanan ko ang mga pagsubok sa gitna ng aking maagang pagmulat sa buhay. Pilit nila akong nilulugmok dahil sa king pagkakamali, ngunit dahil alam kong may nagmamahal sa aking Diyos ay unti-unting napatunayan ko na mali ang mga taong nanakit sa aking damdamin. Parang may nagbabantay sa akin tuwing ako ay malapit nang sumuko at bumigay. Siguro ay alam ng Diyos na ginagawa ko naman ang aking kaya at di ako nag-iisip na gumanti sa mga taong umapi sa akin. Siya na ang gumawa ng paraan upang malupig ang mga salbahe na nakapaligid sa akin. Maaring binabantayan din ako ng aking ama, na matagal nang nagpahinga sa mundo.

Ngayon na ako ay matanda na, at puno pa din ng pakikibaka ang aking buhay, maaring magpalit-palit man ng anyo ang mga halimaw at pagsubok sa aking paligid. Maaring mas malalaki sila at mas mahirap labanan ng patas. Isang bagay lang ang alam ko – malalagpasan ko din ang lahat ng ito at hindi ko kailangang maging katulad ng mga taong ito. Bagkus ay magiging maunawain ako dahil mas nakakaawa ang mga taong hindi marunong umintindi sa kanilang kapwa. Makita man nila ang lahat ng aking kamalian at di nila makita ang lakas na nagmumula sa  aking kalooban, ay may gabay ako na palaging nagliligtas at nagbibigay pag-asa sa araw-araw. Sabi nga sa bibllia, paparusahan ng Diyos ang nang-aapi ng mga balo at mga anak nito. Maaring kaya madalas kaysa hindi ay kusang tumitiklop ang mga nagtatangkang maglagay ng balakid sa aking buhay. Nagpapakilala sa kanila ang lakas ng aking tagapagtanggol. Dahil lahat ng tao ay nagkakamali at ang buhay ay sadyang tungkol sa pagbangon pagkatapos ng bawat pagbagsak.

-He who owns courage may fail, but faith makes him invincible in front of his oppressors.  Look at David, he overthrew his monster in a single javelin throw. This is the kind of faith we need during these difficult days. 

Leave a Reply

Your email address will not be published. Required fields are marked *